बिर्तामोड । झापाको मेचीनगरमा निर्माणाधिन होल्डिङ्ग सेन्टरको काम अन्तिम चरणमा पुगेको छ । संरचना निर्माणको हिसाबले ९५ प्रतिशत काम सम्पन्न भएको निर्माण कम्पनीले जनाएको छ ।

नेपाली सेनाको व्यवस्थापनमा ललितपुरस्थित हनुमान कन्स्ट्रक्सन कम्पनीले निर्माण गरिरहेको होल्डिङ सेन्टर पुष मसान्तसम्म सक्नुपर्ने भनिएको थियो तर, रकम अभावले समयमा काम सम्पन्न गर्न नसकिएको निर्माण कम्पनीले जनाएको छ । ‘निर्माणको काम ९५ प्रतिशत सकिएको छ,’ कम्पनीका साइट मेनेजर जागृत चौरेलले भने,‘बाँकी काम क्यासको काम छ, हामीलाई समयमा बजेट नआएकाले काम सम्पन्न गर्न नसकिएको हो ।’ संरचनाको मुख्य काम सकिएको र इलेक्ट्रिक तथा बेड आइटमको व्यवस्थापन भइरहेको उनले बताए । उक्त सामाग्री खरिदमा दैनिक नगद चाहिने र सरकारले करिब ६५ प्रतिशतमात्र रकम निकाशा गरेको चौरेलको भनाई छ ।

हालसम्म निर्माण सम्पन्न भएर १०० जना क्षमताको भवन नेपाली सेनालाई हस्तान्तरण गरेको साइट मेनेजर चौरेलले बताए । हाल १०० जना क्षमताको लागि सेन्टर तयार भएको जिल्ला प्रशासन कार्यालयलाई जानकारी गराइएको सेन्टरको व्यवस्थापन हेरिरहेको चारआलीस्थित श्री नयाँ श्रीनाथ गणका प्रमुख सेनानी अमरजंग थापाले बताए । एक हप्ताभित्रै थप २०० जनाको लागि समेत पूर्वाधार तयार हुने उनले जानकारी दिए । 

मेचीनगर १४ दुवागढीमा ४ विगाह क्षेत्रफलमा हनुमान कन्स्ट्रक्सनले गत असारबाट निर्माण गरिरहेको होल्डिङ्ग सेन्टरमा २२ वटा घर हुने निर्माण कम्पनीका साइट मेनेजर चौरेलले जानकारी दिए । प्रत्येक घरसँगै एउटा शौचालय र १५ वटा भान्साघर गरी जम्मा ५९ वटा संरचना हुने चौरेलले बताए । सेन्टरको लागत भ्याट बाहेक २५ करोड १ लाख ६३ हजार रहेको उनले चौरेलले जानकारी दिए ।

झापा भारतसँग सिमाना जोडिएको जिल्ला भएकाले कोरोना संक्रमणको समयमा भारतबाट नेपाल आउने ब्यक्तिहरुको स्क्रीनिङ गरि सम्बन्धित पालिकासम्म सुरक्षित ढंगबाट पुर्याउन होल्डिङ्ग सेन्टरको निर्माण अगाडी बढाइएको हो । रोजगारी, अध्ययन, उपचार लगायत विभिन्न कारणले भारत गएका नेपाली नागरिकहरुलाई महामारीको समयमा झापामा काकरभिट्टा नाकाबाट नेपाल प्रबेश गर्न दिइदै आएको छ । यसरी नेपाल आएका मानिसहरुको स्वास्थ्य परिक्षण गरिने, नेगेटिभ रिपोर्ट आएकाहरुलाई सम्बन्धित पालिकाहरुसँगको समन्वयमा सवारीसाधन ब्यवस्थापन गरि गन्तब्यसम्म पठाउने र पोजिटिभ देखिएकाहरुलाई छुट्टै आइसोलेसन सेन्टरमा पठाउने काम होल्डिङ्ग सेन्टरबाट हुनेछ ।

होल्डिङ्ग सेन्टर निर्माण सम्पन्न भएपश्चात त्यसको ब्यवस्थापन नेपाली सेनाले गर्नेछ । होल्डिङ्ग सेन्टरका २२ वटा घरहरु मध्ये दुईवटा घरमा मेडिकल टिम रहने र बाँकी घरहरुमा सामाजिक र भौतिक दुरी कायम गरि मानिसहरु राखिने कर्णेल थापाले बताए ।

प्रिफ्याब प्रविधिबाट निर्माण भइरहेको प्रत्येक घरको लम्बाई १७७.५ फिट र चौडाइ १९.५ फिट  हुने निर्माण कम्पनीले जनाएको छ । मेचीनगरको बसपार्क क्षेत्रमा यस अघिनै निर्माण गरिने भनिएको होल्डिङ्ग सेन्टरको लागि क्षेत्रफल अपुग भएकाले नयाँ स्थान पहिचान गरी होल्डिङ्ग सेन्टर निर्माण गरिएको हो ।

कोरोनाको अघिल्लो लहरमा नेपाली सेनाले आफैँ अस्थायी होल्डिङ्ग सेन्टर निर्माण गरेको थियो । हाल निर्माण भइरहेको होल्डिङ्ग सेन्टर भविष्यलाई समेत हुने गरी निर्माण भइरहेको छ । सरकारले भारतसँग सीमा जोडिएका तराईका आठ स्थानमा होल्डिङ्ग सेन्टर निर्माण गरिरहेको छ ।