बिर्तामोड । रुस–युक्रेन युद्धमा परी इलामका युवा गंगाराज मोक्तानको मृत्यु भएको छ । इलाम नगरपालिका वडा नम्बर ९, सुकिलुम्बा निवासी ३२ बर्षीय गंगाराजको रुस–युक्रेन युद्धमा परि कात्तिक २९ गते मृत्यु भएको हो ।

रुसको मस्कोस्थित नेपाली दूतावासले गत ८ गते नेपालस्थित कन्सुलर सेवा विभागलाई पत्राचार गरेर ३ नेपालीको मृत्यु भएको जानकारी दिएको थियो । त्यसमध्ये एक जना इलामका गंगाराज रहेका छन् ।

उनीहरूको गत कात्तिक २९ गते भाइटीकाको दिन रुसी सेनामा कार्यरत रहेकै बेला मृत्यु भएको हो । तर, २ सातापछि मात्र घटना सार्वजनिक भएको छ । गंगाराज २ महिनाअघि मात्रै रुस गएका थिए ।

नेपाली सेनाको जागिर छाडेर उनी युएई गएका थिए । त्यहाँ उनले ४ वर्ष बिताए । नेपाली सेनाको जागिरबाट राजीनामा दिएर वैदेशिक रोजगारीका लागि २०७६ साल मंसिर ७ गते दुबई गएका उनी दुबईमा वेटर जागिर छोडेर केही समयअघि मात्रै रुस छिरेका थिए । असोज पहिलो साता गंगाराज रुस छिरेको पारिवारिक स्रोतले बताएको छ । दुबईमा राम्रो कमाई नहुने देखेपछि परिवारको उज्जवल भविष्यले तड्पिएका गंगाराज माल्टा जान चाहन्थे तर सहज रुपमा माल्टा जान नपाएपछि उनले रुस छिर्ने योजना बनाए । द्वन्दग्रस्त क्षेत्रमा नजान श्रीमती याङ्किला शेर्पाले उनलाई आग्रह गरिन् तर दुबईमा राम्रो कमाई नहुने देखेका गंगाराज रुस गएरै छाडे ।

गंगारामले हप्तामा एकपटक उतैबाट फोन गर्ने गरेको पारिवारिक स्रोतलाई उद्धृत गर्दै वडाध्यक्ष गोपाल चौहानले जनाए । ‘उता लडाइ चलिरहेको छ । यताबाट फोन गर्न नमिल्ने भन्दै उनले उतैबाट श्रीमतीलाई फोन गर्ने गर्दा रहेछन्,’ वडाध्यक्ष चौहानले भने ।

गंगारामले नागरिकता ताप्लेजुङको साथीलाई दुबईमा छोडेको पाइएको उनले बताए । ‘साथी आउँदा ल्याइदिन्छ भनेर उनले भनेका रहेछन्,’ उनले भने, ‘मलाई दायाँ–बायाँ भयो भने तिम्रो नम्बर दिएको छु । तिमीलाई सिधै फोन आउँछ । सिधै फोन आएन भने राजदूतावासबाट खबर आउँछ भनेर मारिनुभन्दा अगाडि घरमा श्रीमतीलाई फोन गरेका रहेछन् ।’

वडाध्यक्ष चौहानका अनुसार गंगाराजको मृत्यु भएको खबर तीन दिनअघि कन्सुलर विभागमार्फत जानकारी आएको थियो । त्यसपछि मृतकका भाइ–बहिनीसहित प्रहरीकहाँ पुगेर खोजी गर्दा पुष्टि भएको थियो ।

गंगाराजको शव नेपाल ल्याउनका लागि वडाले कागजात तयार पारेर पठाएको पनि वडाध्यक्ष चौहानले जानकारी दिए । गंगाराजको मृत्युको खबरले यतिबेला गाउँ नै शोकमा डुबेको छ । उनका छोरा ७ वर्षका छन् ।

रुसमा गंगारामसँगै ज्यान गुमाउनेमा स्याङ्जाको पुतलीबजार नगरपालिका–५ का प्रितम कार्की र दोलखाका मेलुङ गाउँपालिका–६ का राजकुमार रोका रहेका छन् ।