बिर्तामोड । प्रेस सेन्टर नेपालका केन्द्रीय सचिवालय सदस्य दिपीन राई पुरस्कृत भएका छन् । राईलाई नेपाल आदिवासी जनजाति पत्रकार महासंघ (फोनिज)ले फोनिज युके पत्रकारिता सम्मान तथा पुरस्कार प्रदान गरेको हो ।

नेपाल पत्रकार महासंघको स्थापना दिवस र महासंघका संस्थापक सत्यनारायण बहादुर श्रेष्ठको योगदानको सन्दर्भमा आइतबार काठमाण्डौमा आयोजित कार्यक्रममा राईलाई उक्त पुुरस्कार प्रदान गरिएको हो ।

पत्रकार राईसँगै चितवनकी पत्रकार संगीता चेपाङलाई उक्त पुरस्कारबाट पुरस्कृत भएकी छन् । महिला, बालबालिका तथा ज्येष्ठ नागरिकमन्त्री भगवती चौधरीले दुबै पत्रकारलाई उक्त पुरस्कार प्रदान गरिन् । पुरस्कारको राशी जनही २५ हजार रुपैँया रहेको छ ।

कार्यक्रमकी प्रमुख अतिथी मन्त्री चौधरीले सत्य तथ्यका आधारमा पत्रकार महासंघको संस्थापक अध्यक्षको विवाद निरुपण हुनुपर्ने बताइन् ।

कार्यक्रममा फोनिजका अध्यक्ष गजुरधन राईले पत्रकारहरुलाई संगठित गरेर पहिलोपटक पत्रकार संघ गठन गर्ने व्यक्ति सत्यनारायण बहादुर श्रेष्ठ नै भएको इतिहासको तथ्य रहेको बताए । पत्रकार महासंघले संस्थापक अध्यक्षको विवाद निरुपण गर्दै वैशाख ९ गते स्थापना दिवस मनाउनुपर्ने उनको सुझाव थियो ।

कार्यक्रममा फोनिज युकेकी निवर्तमान अध्यक्ष गोमा रानामगरको  समेत उपस्थिति रहेको थियो ।