बिर्तामोड । मिलनसार बचत तथा ऋण सहकारी संस्था लि.ले १० जना व्यक्तिलाई सम्मान गरेको छ । शनिबार सम्पन्न साकोसको १६औँ बार्षिकोत्सवको अवसरमा उनीहरुलाई सम्मान गरेको हो ।

अर्जुनधारा–६ स्थित सीके चिन्तन प्रतिष्ठानको सभाहलमा सम्पन्न साधारण सभामा उत्कृष्ट बचतकर्ताको रुपमा सबिता रिजाल, देविमाया लिम्बु र कोमलदेवि रजक सम्मानित भएका छन् । त्यस्तै असल ऋणिको रुपमा रिता लिम्बु, कमल विक्रम श्रेष्ठ र सोमुलाल राजवंशीलाई सम्मान गरिएको थियो भने भावना खतिवडा उत्कृष्ट कर्मचारीको रुपमा सम्मानित भइन् । शेयर सदस्यका छोराछोरीहरु मध्ये गत एसईईमा उत्कृष्ट नतिजा ल्याउने मध्ये युनिस बास्कोटा र रिया खतिवडालाई सम्मान गरिएको थियो । सम्मानित सबैलाई नगद दुई हजारसहित सम्मान पत्र प्रदान गरिएको थियो ।

कार्यक्रममा विभिन्न कारण सहकारीहरुको अवस्था खस्कँदै गएको भएपनि मिलनसार साकोसको अवस्था अब्बल रहेको अध्यक्ष लक्ष्मीप्रसाद बास्कोटाले प्रतिवेदन प्रस्तुत गर्दै जानकारी दिए । साकोसले गत आवमा २९ लाख ९७ हजार ९०४ रुपैँया खुद नाफा कमाएको, जगेडा कोष वृद्धि गरी ६५ लाख ५ हजार ९८४ रुपैँया पुर्याएको, बाह्य ऋण शुन्यमा झारेको उनले जानकारी दिए ।

गत आवमा ४ जना सदस्यलाई उपचार खर्चबाट ४० हजार र ४ जना शेयर सदस्यको परिवारको मृत्यु हुँदा सरय बापत ३१ हजार प्रदान गरिएको अध्यक्ष बास्कोटाले जानकारी दिए । संस्थाले विभिन्न किसिमका दैनिक तथा आवधिक गरी १९ किसिमका खाता सञ्चालन गरेको र अधिकतम ११ प्रतिशतसम्म व्याज सदस्यलाई प्रदान गर्दै आएको उनले बताए ।

साधारण सभाले संस्थाले आर्जन गरेको आम्दानीबाट १० प्रतिशत शेयर लाभांश दिने प्रस्ताव पारित गरेको छ ।

संस्थामा २७५० जना शेयर सदस्य र २ करोड २० लाख ६ हजार आठ सय रुपैँया शेयर रकम रहेको छ ।

संस्थाका अध्यक्ष लक्ष्मीप्रसाद बास्कोटाको अध्यक्षतामा सम्पन्न साधारण सभा सचिव कैलाश पोखरेलले सञ्चालन गरेका थिए । प्रमुख अतिथी संस्थाका ज्येष्ठ सदस्य अविचन्द्र पोखरेल रहेको कार्यक्रममा सहभागीहरुलाई उपाध्यक्ष अजय देवले स्वागत गरेका थिए ।