बिर्तामोड । पूर्वी नाका काँकरभिट्टाबाट इलेक्ट्रिक मोटरसाइकल आयातमा उल्लेख्य वृद्धि भएको पाइएको छ । गत आवको तुलानामा चालु आवमा इलेक्ट्रिक मोटरसाइकल आयात डेढ गुणाले बढेको हो ।

गत आवको १० महिनाको अवधिमा ३१८२ वटा मोटरसाइकल आयात भएको मेची भन्सार कार्यालयले जनाएको छ । उक्त संख्यामा आयात भएको इलेक्ट्रिक मोटरसाइकलको मुल्य ८ करोड ५० लाख १५ हजार रहेको र ४ करोड २५ लाख दुई हजार रुपैँया राजश्व संकलन भएको मेची भन्सार कार्यालयका सूचना अधिकारी इश्वरकुमार हुमागाईले जानकारी दिए ।

चालु आवको सोहि अवधिमा १९ करोड ३२ लाख ९० हजार मूल्य बराबरको ५३३१ थान मोटरसाइकल आयात भएको हुमागाईले जनाएका छन् । सो बापत १० करोड ४५ लाख ५९ हजार राजश्व संकलन भएको छ । अघिल्लो आवको भन्दा यो १४५.३ प्रतिशले बढी हो ।